‘Oku kei hokohokoatu pe ‘a e ngaue ‘a e Charity ‘a e Ta’ahine Kuini Nanasipau’u ki hono tufaki atu ‘a e ngaahi ‘ofa mo e tokoni ki he Kakai ‘o e Fonua pea mo e ngaahi ‘Apiako Katolika.
Na’e a’utaki mai ‘a e Koniteina ‘Ofa naunau ako mei ‘Aositelelia ‘i he fengaue’aki vaofi ‘a e Konisela Fakalangilangi ‘a Tonga ‘i Senee, Louise Waterhouse mo e Kautaha vaka Swire Shipping ki hono fakafolau mai ‘a e tokoni naunau ako mei he ‘Apiako Bethany Catholic School pea mo e ‘Apiako Regina Coeli Primary School mo e Kautaha Tokoni Thread Together mo e SmartAID ‘i ‘Aositelelia.
Ko e ngaahi tokoni naunau ako ‘oku kau ‘i he Polokalama Tokoni ‘a e Swire Shipping ko e Pacific School Furniture Program ‘aia ‘oku nau fengaue’aki pea mo e ngaahi ‘Apiako ‘i Tu’apule’anga ki hono fakafolau atu ‘a e ngaahi naunau ako ki he ngaahi ‘Otu Motu ‘o e Pasifika ‘oku to e fiema’u viviliange. Ko e Polokalama ni na’e kamata ‘i Ha’amoa pea hoko mai ‘eni ki Tonga ni.
Ko e ngaahi naunau tokoni na’e lavemonu ai ‘a Kolisi Apifo’ou, ‘Ahopanilolo Technical Institute pea mo e St. Francis of Assisi Kindergarten ko e ngaahi naunau ako kehekehe ki he ‘Ofisi ‘o e Ako pea mo e fanau ako.
Ko e konga ‘e taha ‘o e tokoni na’e kau kiai ‘a e mohenga falemahaki mo e naunau ki Fale Mahaki, mo e ngaahi solar panel ‘oku taumu’a ke fokotu’u ‘i he Falemahaki ‘Eua mo Ha’apai ‘e he Sione’s Foundation ‘i he ngaahi uike ka hokomai.
Na’e fakafolau atu ‘a e konga ‘o e ngaahi tokoni vala mo e me’atokoni ki he Kainga ‘i he Ongo Niua ‘e he Kau Tau ‘o ‘Ene ‘Afio ‘i he mahina kuo’osi pea ‘oku teuteu ke to e fakafolau ‘a e ngaahi tokoni ki ‘Eua, Vava’u mo Ha’apai ‘i he ngaahi uike ka hokomai.
‘Oku kei fengaue’aki vaofi pe ‘a e Maa’imoa Charity ‘a e Ta’ahine Kuini mo e kau ngaue ‘a e ‘Ofisi ‘o e Palasi, Kau Tau ‘o ‘Ene ‘Afio, ngaahi Potungaue ‘o e Pule’anga pea pehe ki he ngaahi kupu fekau’aki ke fakapapauii ‘oku ‘autonu ‘a e ngaahi ‘ofa mo e tokoni ki he ni’ihi ‘oku ‘uesia mo tu’u lavea ngofu he taimi faingata’a ko ‘eni.
HER MAJESTY QUEEN NANASIPAU'U CHARITY 