Tufa ‘o e ngaahi tokoni.

‘Oku kei hokohokoatu pe ‘a e Charity ‘a e Ta’ahine Kuini ki hono ‘ofa mo e tokoni kia kinautolu na’e ‘uesia ‘i he fakatamaki ‘o e peaukula ‘o e ‘aho 15 ‘o Sanuali 2022.

Ko e ngaahi ‘ofa kuo a’utaki mai ki he Ma’aimoa ‘oku kau ki ai ‘a e:

(i) ‘ofa me’atokoni mo e ngaahi katuni vai meia ALFRED COWLEY, JOSEPH RAMANLAL VALLABH PEA MO ‘ANAU ‘aia na’e tufa ki he Kainga ‘o ‘Ene ‘Afio ‘i Kanokupolu pea mo ‘Ahau pea pehe ki he Kainga ‘o e Tama Pilinisi Ata mei ‘Atataa mo Ha’atafu he hili pe ‘a e to ‘a e fakatamaki ‘i Fepueli 2022.

(ii) ‘ofa me’atokoni meia SALOTE COCKER ‘o kau ki heni ‘a e ngaahi Puha moa, puha pulu , ngaahi katuni vai, suka mo e ngaahi me’atokoni kehe. Ko e ‘ofa ni na’e tufa ki he kainga ‘I Kanokupolu kia Veisinia Monu, ki he ‘Ofisa Kolo ‘o ‘Atataa ko Sikula, ki he kainga Ha’atafu kia Mele Sila pea mo e kainga ‘I ‘Ahau kia Masiva Vakalahi.

(ii) ‘ofa me’atokoni mo e vai mei he CHINESE COMMUNITY FIJI ka na’e fakafou mai ‘ia Li Yuan Zhong (Sea ‘o e China Tonga International Trade, Culture and Development Promotion Association) pea mo Hong Shu Yang.

Na’e lavemonu he tokoni ni ‘a e Kainga ‘o Patangata, Siesia pea pehe foki ki he ni’ihi na’e ‘uesia lahi honau ‘api nofo’anga ‘i he Hala Vuna ‘o kau ki ai ‘a e ‘api nofo’anga ‘o e Palesiteni ‘o Siasi ‘Ahofitu Fanueli Mataele, ‘api nofo’anga ‘o ‘Atelea Kautoke pea pehe ki he fale ngaue/’api nofo’anga ‘o Vili Tohi.

(iii) Koniteina ‘ofa mo e tokoni mei he AOTEAROA TONGA RELIEF COMMITTEE ‘aia ‘oku tataki ‘e Jenny Salesa pea mo ‘Anahila Kanongata’a pea mo e fengaue’aki pea mo e ni’ihi ‘i he mala’e ‘o e ‘akapulu ‘I Nu’usila mo e pisinisi ‘o kau ki ai ‘a Sir Michael Jones, Sir Graham Hart pea mo e ongo tangata pisini ko Wayne Smith pea mo Siliva Payne.

Ko e ngaahi koloa ‘ofa ne kau ki ai ‘a e ngaahi puha me’atokoni kehekehe, ngaahi katuni puha vai, ngaahi takainga tupenu pea pehe foki ki he naunau COVID ko e ‘alcoholic wipe’. Na’e lavemonu ‘a e kainga ‘o Kanokupolu, Mango pea mo ‘Atataa he tokoni ni.

‘Oku teuteu ke fakafolau atu ‘a e konga ‘o e ngaahi tokoni ki he kainga ‘o Fonoifua pea mo e Nomuka ‘e he Kau Tau ‘o ‘Ene ‘Afio pea mo e Kau Tau ‘o e HMAS Canberra.

(iii) Na’e fakahokomai ‘e Archdeacon Ngira Simmonds (Private Secretary ‘a e Tu’i Mauli) ‘a e Koniteina ‘ofa mo e tokoni ‘a e TAMA TU’I MAULI KIINGI TUHEITIA PEA MO E KAINGA MAULI ki he Kakai ‘o Tonga.

‘Oku kau he ‘ofa ni ‘a e ngaahi katuni vai, ngaahi katuni me’atokoni pea pehe ki he ngaahi me’angaue ke tokoni ki he ni’ihi na’e ‘uesia ‘i he fakatamaki ‘o e peaukula.

‘Oku teuteu ke fakafolau atu ‘a e ngaahi ‘ofa mei he Tu’i Mauli mo hono kainga ki he Vahefonua ‘Eua ke tokoni ki ha ni’ihi na’e ‘uesia ‘i he fakatamaki.

‘Oku ‘amanaki ke taumai ‘a e ngaahi Koniteina Tokoni mei ‘Aositelelia, Nu’usila pea pehe ki Hawai’i ‘Ii he ngaahi uike ka hokomai.

‘Oku hokohokoatu pe ‘a e fengaue’aki vaofi ‘a e Maaimoa ‘a e Ta’ahine Kuini mo e kau ngaue ‘a e ‘Ofisi ‘o e Palasi, Kau Tau ‘o ‘Ene ‘Afio, ngaahi Potungaue ‘o e Pule’anga pea pehe ki he ngaahi kupu fekau’aki ke fakapapauii ‘oku ‘autonu ‘a e ngaahi ‘ofa mo e tokoni ki he ni’ihi ‘oku ‘uesia mo tu’u lavea ngofu he taimi faingata’a ko ‘eni.